என்னை அல்ல

ஒரு நொடியில் சமஸ்தானம் அனைத்தையுமே
ஒருங்கிணைத்துத் தந்த படேல் எங்கள் வீரர்
சிறுமைகளே மனத்தில் இல்லாச் சிறந்த வீரர்
செய்கைகளால் பாரதத்தைச் சிறக்க வைத்தார்
தருகின்றார் பதவியினைக் கட்சி மேலோர்
தக்கவர்தான் பதில் தந்தார் நீங்கள் அல்ல
வறுமையிலும் நோயிலுமே வாடும் மக்கள்
வாழ்த்துவது நேருவையே என்னை அல்ல

வாழ்க இந்திரா

இந்திய முகவரி என்று சொன்னால்
என்றுமே எங்குமே அன்னையவர்
விந்தியம் இமயம் விரிகடல்கள்
வித வித மக்கள் அனைவருக்கும்
சொந்தமாய்த் தாயாய் அவர் இருந்தார்
சுட்டனர் மூடர்கள் இல்லத்துள்ளே
வந்தனை செய்வோம் அவரை இன்று
வழி தனில் செல்வோம் வாழ்க இந்திரா

தீபாவளி

நாடெங்கும்
நரகாசுரர்
கண்ணன்
சத்யபாமாவைக்
காணவில்லை

மரபுக் கவிஞர்

பணத்திற்காய் யாரிடத்தும் பல்லிளித்து
பணிவது போல் நடித்து அவர் பக்கம் நின்று
குணமுடையார் யாரையுமே அருகில் சேர்க்க
கூச்சமுற்று கொள்ளையராம் துறவியர்க்காய்
நிணம் தசை நார் எதிலுமே நாணம் இன்றி
நெஞ்சழிந்து நிற்கின்றார் மரபில் வந்தோர்
பிணம் அவர் தான் என்ன செய்ய பணக்காரரின்
பின் நின்று ஏமாற்றும் கவிஞர் இவர்

முதல்வர் வாழ்க

வடமொழிதான் தமிழுக்கு அனைத்தையுமே
வழங்கியதாய்க் கூறுகின்ற பத்மா கேட்க
அட அடடா முதல்வருமே அடிக்கல் நாட்டி
ஆரம்பம் செய்து விட்டார் வாழ்க தமிழ்
பட படத்துப் பெரியாரைப் பேசுகின்றார்
பைந்தமிழுக்கு அண்ணாவைக் கூறுகின்றார்
பரதருடன் இளங்கோவைச் சேர்ப்பதற்கு
பத்மாவின் அருளையுமே பெற்று விட்டார்

ரஜனி ரசிகர்கள்

உணவளிப்பேன் என்று சொன்னார் ரஜனி காந்தும்
ஊர் ஊராய் ரசிகர்கட்கு என்றே சொன்னார்
மனம் நிறைந்தார் ரசிகரெல்லாம் அளித்தார் இல்லை
மராட்டியத்தின் பால் தாக்கரே குருவென்கின்றார்
இனமானத் தமிழர்களின் தலைவர்களோ
என்றைக்கு வாய் திறந்தார் குடும்பம் காப்பார்
படம் ஒட அனைவரையும் சென்று பார்த்தார்
பாவம் அவர் ரசிகர்களோ என்ன செய்வார்

இளையராஜா இசையே வெல்லும்

இளையராஜா தனைக் குறையாய்ப் பேசுவோர்கள்
ஏவலர்கள் மேட்டுக் குடிக் கூட்டத்திற்கு
உழைகிறது அவர் மனது ஏழையவர்
உயர்ந்த இசை கொல்கிறது அவர்களையே
பிழை எழுதிப் பார்க்கின்றார் சில பேர் இங்கே
பேர் பெற்ற அவராலே பேர் பெறவே
களை அவரைப் பிடுங்குதலே நமது வேலை
ககனமெல்லாம் இளையராஜா இசையே வெல்லும்

நம்மோர் சில்லோர்

பொய்த் துறவிக் கூட்டத்தார் பெருகி விட்டார்
பொன்னழகுத் தமிழ்நாட்டில் என்ன செய்ய
மெய்த் தவத்தார் நாடு நந்தம் நாடு என்று
மேல் நாட்டார் வணங்குகின்றார் அவர் பணத்தை
கைத்தலத்தில் பற்றி நன்கு வாழுகின்றார்
கழிசடையாம் இத் துறவிக் கூட்டத்தாரும்
அத்துறவிக் கூட்டத்தின் அடிமைகளாய்
ஆகி பணம் சேர்க்கின்றார் நம்மோர் சில்லோர்

மரபில் பிழை

பிழைப்பதற்காய் எதனையுமே விட்டுத் தரும்
பேதைகளே வாழ்வதுவாய் நினைக்கின்றார் காண்
குழைந்து அவர் பணம் செய்தோர் முன்னே மிகக்
குறுகி நிற்கும் காட்சியினைக் காணும் போது
தொலைந்து போகும் நல்லவரின் மனது அங்கே
துடித்து நிற்பார் பெரியவர்கள் நொந்து நொந்து
பிழையாகப் பிறந்து விட்டார் தமிழர் நாட்டில்
பெரும் பிழைதான் என்ன செய்ய மரபில் பிழை

உணர்கின்றோம் நாம்

துறவியென்ற பெயரில் இங்கு நடித்து வாழும்
தூய்மையற்ற திருடருக்குத் துணையாய் நின்று
வரவினையே பெருக்கி உள்ளம் ஒழித்து வாழும்
வடிவத்தார் பணம் படைத்தோர் வீட்டில் எல்லாம்
கரவு மனத்தோடு ஏவல் செய்து வாழும்
கண்ணியமே அற்றாரைக் காணும் போது
இரந்து வாழும் வறியவரை விடவும்
இவர் எத்தனையோ கீழ் என்றே உணர்கின்றோம் நாம்

புரியவில்லை

வெள்ளையரின் அடிமைகளாய் இருந்தோம் என்று
வெளிச்சமிட்டுக் காட்டுதற்காய் ஒரு அமைப்பு
துள்ளி விளையாடுகின்றார் டில்லி மண்ணில்
துவக்கி வைக்க இளவரசர் வந்து சென்றார்
எண்ணுகின்றேன் எண்ணுகின்றேன் இவ்வமைப்பு
ஏதுக்காய் இருக்கின்றது கேவலமாய்
மண்ணுலகில் அடிமைகளாய் இருந்ததனை
மறக்காமல் இருப்பதற்கா புரியவில்லை

வாழுகின்றார்

சாமியார்கள் தனை வைத்துப் பிழைப்பவர்கள்
சரியாகப் பணம் சேர்த்து வாழ்கின்றனர்
யாரிடத்தும் கைகள் கட்டி வாழ்கின்றனர்
எவரிடத்துப் பணம் எனினும் வணங்குபவர்
தாமறிந்த தமிழ்த் தரத்தை இழந்து நிற்பார்
தன் குலத்துப் பெருமைகளும் துறந்து நிற்பார்
யாமறிவோம் பணம் இவரைப் படுத்துவதை
என்ன செய்ய இவரும் தான் வாழுகின்றார்

அண்ணலே

அண்ணலே
உன் பிறந்த நாள்

சமாதியில்
பஜனை உண்டு

சிலைகளுக்கு
மாலை
அணிவிப்பவர்
சிலர்
நீ
உயிரோடிருந்தால்
உன்
அருகில் வரவே
அஞ்சியிருப்பார்கள்

உன்னை
மறந்து விட்டோம்
என்கின்றனர்

அதனால்தான்
அமைச்சர்களாய்
இருக்க முடிகின்றது

ஆட்சி
செய்ய
முடிகின்றது

உன்னை
மறைத்து
விட்டோம்
என்கின்றனர்

என்ன செய்ய
எங்களுக்கும்
மனச் சாட்சி
வந்து
விட்டால்

சாஸ்திரியும்
இதே
நாளில்
பிறந்த
கொடுமையை
என் சொல்ல

அதனால் தான்
மனம்
வெதும்பிய

கறுப்புக்
காந்தி
இன்று
மறைந்தார்