உலகை வெல்வீர்

 இறைவன் அவன் என்னோடு இருப்பதனால்
  என்றென்றும் அன்பு செய்து வாழுகின்றேன்
  தலைவன் அவன் எனைத் தழுவிக் கொண்டதனால்
  தமிழோடு தமிழோடு வாழுகின்றேன்
  குறையென்று எண்ணாமல் அனைத்தையுமே
  கொடுத்தவனே அவன் என்று உணர்வதனால்
  நிறைவாக வாழுகின்றேன் தமிழாம் அன்னை
  நிலை பேறு தந்து நின்றாள் மகிழுகின்றேன்


  தொட்டதெல்லாம் நினைவிலே கொண்டு தந்து
  தூய தமிழ்த் தாயவளும் வாழ்த்துகின்றாள்
  கெட்டவரை நல்லவராய்க் காணுகின்ற
  கேண்மையையும் அவளேதான் தந்து நின்றாள்
  திட்டுகின்றார் என்றாலும் அவருக்காக
  தினந்தோறும் இறைஞ்சி நிற்பேன் இறைவனையே
  கட்டுரைக்கவில்லை இது உண்மை உண்மை
  கனித் தமிழீர் அன்பு செய்து உலகை வெல்வீர்