மதத்தார் கடன்

இளமையிலே வறுமை அது கொடியதென்று
எப்பொழுதோ சொல்லிச் சென்றாள் அவ்வை யவள்
உளம் கொண்டார் ஆளுபவர் எல்லாம் என்றால்
உலகினிலே வன்முறைகள் இலவே இல்லை
களம் காண வைக்கின்றார் ஏழைகளை
கதைக்கின்றார் அவர்களிடம் மதங்கள் பற்றி
பிணமாக்கிப் பார்க்கின்றார் பலரை இங்கு
பேதையான இளைஞர்களே வீழுகின்றார்


துணி எடுத்துத் தர முடியாத் தந்தை விட்டு
தூர வந்து வறுமையினால் திருடனாகி
பிணி வறுமை திர்ப்பதற்கு பணத்தைக் காட்டி
பின்புலமாய் இருப்பதுவாய் நம்ப வைத்து
அணியாக்கி அனுப்பி வைத்தார் ஏழை தன்னை
ஆர் என்று கேட்கின்றார் அவனை இன்று
வணிகமதாய் ஏழையர் தம் வறுமை தன்னை
வளைக்கின்றார் இறைவனது வழியறியார்

மதங்களுக்குள் சண்டையில்லை இலவே இல்லை
மனிதர்களின் மடமையினால் சண்டையிங்கு
விதம் பிரித்து வினை விதைத்து தலைமை தாங்கி
வெறியூட்டி மனம் கொன்று பலரைக் கொன்று
அடம் பிடித்து அலைகின்றார் அழித்தல் செய்வார்
அவர் தமையும் திருத்தி நல்ல மனிதராக்கி
புடம் போட்ட தங்கமதாய் மாற்றல் நல்ல
புனிதமதை போற்றுகின்ற மதத்தார் கடன்