கத்தி ஏந்தி

பெரும்பான்மை நான் இங்கு சிறுபான்மை நீ இங்கு
பெரியவன் நான் உணர் நீ
பேசவோ பாடவோ உனக்கில்லை உரிமை நீ
பேசினால் நாக்கறுப்பேன்
அரும்பவே கூடாது உனக்கிங்கு எண்ணங்கள்
அரும்பினால் அழித்தொழிப்போம்
ஆசையோ பாசமோ கொள்ளாதே கொண்டாலே
அடிப்போம் நீ ஒதுங்கிக் கொள்ளு


உலகெங்கும் இந்நிலை இதுவேதான் இங்கேயும்
உணர்வாரும் பேசவிலையே
உண்மையை ஒழிப்பதில் வெல்பவர் தானெலாம்
உயர்ந்தார்கள் வெட்கமிலையே
கலகங்கள் செய்வதும் கண்ணியம் கொல்வதும்
கைக் கொண்டார் நாணவிலையே
காந்தியின் தேசமாம் சொல்கிறார் சொல்கிறார்
கைகளில் கத்தி ஏந்தி

தகுதியில்லை

தடுமாறித் தடுமாறித் தாங்கிடப் பிறர் நாடி
தவிக்கின்ற வாழ்க்கை விட்டு
தமிழோடு மேடையில் விளையாடும் போதினில்
தலைவா என் உயிர் கொள்க நீ
புடம் போட்ட தங்கமே பொன்னார்ந்த மேனியே
புழு என்னைச் சிங்கமாக்கிப்
போற்றி என் தமிழினை எனக்களித்து என்னையே
புகழ் செய்தாய் அருள் செய்க நீ


உறவென்று நீ தந்த உறவுகள் மட்டுமே
உறவென்று கொண்டேனில்லை
ஊரெங்கும் கண்டிட்ட நல்லவர் அனைவரும்
உறவென்று கொண்டு வாழ்ந்தேன்
கரவாக வாழ்கிறார் கவலைகள் சேர்க்கிறார்
கண்ணியம் காத்து நின்றேன்
தலைவா நீ தந்ததை மேலென்றும் கீழென்றும்
தரம் பார்க்கும் தகுதியில்லை

ஒதுங்கி விடும்

மரணத்தை நோக்கியே பயணங்கள் அனைத்துமே
மனதினில் கொண்டு வாழ்வார்
மனிதனாய் வாழ்வதில் மனங் கொண்டு மனங்கொண்டு
மனிதருக்கு உதவி நிற்பார்
சரணமாய் இறைவனின் சந்நிதி முன் நிற்பார்
சத்தியம் கொண்டு வாழ்வார்
சகலரும் வாழ்ந்திட தன்னையே தந்திடும்
சமரச வாழ்வு வாழ்வார்


கோடிகள் கொண்டிட எண்ணங்கள் கொண்டவர்
கொள்கைகள் இன்றி வாழ்வார்
குடும்பத்தை அன்றியே ஊரினில் யாரையும்
கூட்டாக எண்ண மாட்டார்
நாடி தளர்ந்தெலாம் ஒடுங்கிய பின்னரும்
நல்லதை நாட மாட்டார்
நல்லவை இவர் வீட்டு வாயிலைக் காணவே
நாணியே ஒதுங்கி விடும்

நல்லோர் உள்ளில்

இறந்து விட்டார் என்ற செய்தி வந்த பின்பே
இருந்ததுவே தெரிகிறது நமக்கு இங்கு
இருக்கையிலே இறந்து விட்ட இவரின் வாழ்க்கை
எதற்கென்று தெரியாமல் குழம்புகின்றோம்
பிறந்து விட்ட காரணத்தால் வாழ்ந்த இவர்
பிரிந்ததிலே யாருக்கும் வருத்தமில்லை
சிறந்திருந்தார் மரணமதோ என்றும் என்றும்
சிந்தனையில் நிற்கிறது நல்லோர் உள்ளில்

தலைவரானார்

அகிம்சையினை அரசியலில் இணைத்து வென்ற
அண்ணல் காந்தி சட்டமதைக் கற்றவர் தான்
அகிலமெல்லாம் போற்றி நின்ற அண்ணல் சீடர்
அன்பு நேரு அவர் சட்டம் படித்தவர் தான்
தரித்திராராய் அடிமைகளாய் நீண்ட நாட்கள்
தனை உணர மறந்தவர்களாய் இருந்தவர்க்காய்
பவித்திரமாம் புத்த மதம் தழுவி வென்ற
பாபா அம்பேத்கர் சட்டம் படித்தவர் தான்
தனித்தனியாய் நின்று துன்பம் தர நினைத்த
தான்தோன்றி மன்னர்களை ஆற்றல் கொண்டு

ஒரு குடைக்குள் கொண்டு வந்த சர்தார் படேல்
உத்தமரும் சட்டத்தைப் படித்தவர்தான்
இருபதோடு இருபதாண்டு தண்டனையை
இன்முகத் தோடேற்றுச் சிறை சென்ற வீரர்
கரு மனத்து வெள்ளையரின் சிறைக் கூடத்தில்
கல்லுடைத்துச் செக்கிழுத்த சிதம்பரமும்
அருமை மிகு சட்டமதைப் படித்தவர்தான்
அன்று சட்டம் படித்தவரே தலைவரானார்
பெருமை இது நம் நாட்டின் பெருமை இது
பெரியவர்கள் தேடி வைத்த பெருமை இது

சொந்தமில்லை

கை கட்டி வாய் பொத்தி பிச்சையேற்றுக்
கனித்தமிழை முறையாக உணர்ந்தவர்கள்
பை தன்னை நிரப்புதற்காய் மானம் விட்டு
பைத்தியங்கள் முன்னாலே நிற்பதில்லை
வைதாலும் ஆளை வைத்து மிரட்டினாலும்
வண்டமிழை யாரிடத்தும் விற்பதில்லை
பொய்யாக வாழ்ந்திடவே நடிப்பார் சிலர்
பொதிகைத் தமிழ் அவருக்குச் சொந்தமில்லை

தமிழன்னை துன்பம் கொண்டு

ஆட்சியாளன் தவறு தன்னை சுட்டிக் காட்டி
அவன் அவனைத் தண்டித்து மரணம் கொள்ள
காட்சி அதைத் தமிழர்களின் மனதில் எல்லாம்
கண்ணகியாள் வழியாக இளங்கோ தந்தார்
மாட்சிமை சேர் மனு நீதிச் சோழன் அவன்
மகனையே தன் தேர்க்காலில் இட்டுக்கொன்ற
ஆட்சி நெறி தன்னை அன்றே சேக்கிழார் தான்
அழகான தமிழ் மொழியில் நமக்களித் தார்


பேச்சு வெறும் பேச்சு இதை அரங்கம் தோறும்
பேசுகின்றோம் மகிழுகின்றோம் கலைகின்றோம் நாம்
கூச்சம் இல்லை இங்கு வாழ -- கொடுமைகளின்
கூத்தாட்டம் கண்டும் நாம் வாழுகின்றோம்
ஆச்சிகளின் காலத்தில் தமிழர் ஆண்ட
அறநெறிகள் தனை நினைத்தே ஏங்குகின்றோம்
போச்சு அந்தக் காலமெல்லாம் போச்சு என்றே
புலம்புகின்றோம் அழுகின்றோம் உயிர் வாழ்கின்றோம்


ஆட்சியாளர் தமைப் புகழ்தல் அவர்கள் வீட்டு
அடுக்களையைப் பாராட்டிக் கவி படைத்தல்
கூச்சமின்றி அவர்கள் வீட்டு நாயைக் கூட
குளிப்பாட்டல் அதற்கும் கூட நற்றமிழில்
பாட்டெழுதல் அது குரைத்தால் அதற்கும் கூட
பைந்தமிழில் விளக்கங்கள் எழுதிப் போற்றல்
கூட்டம் ஒரு கூட்டம் இதை பெற்றதாலே
குமுறுகின்றார் தமிழன்னை துன்பம் கொண்டு

குறட் கருத்து

உறவு அற்று தொழிலும் அற்று பொருளும் அற்று
உணவும் அற்று ஒன்று மற்று நிற்பார் தம்மின்
அழி பசியை அழித்தவர்க்கு உணவு தந்து
அன்றாடம் காத்து நிற்பார் அது மட்டுமே
செறிவாகக் காப்பாக இருக்கும் என்றும்
சேமிப்பு அது ஒன்றே இறுதி வரை
அறிவீர் நீர் மானிடரே உணவளியும்
ஆண்டவனின் கணக்கினிலும் முதலிடமே


குறள்

அற்றார் அழி பசி தீர்த்தல் அ தொருவன்
பெற்றான் பொருள் வைப்புழி

இந்த இராமர் வேறு

வேடன் தன்னை உறவாய்க் கொண்ட
வில்லின் வேந்தன் இராமர்
விருப்பம் கொண்டு குரங்கைக் கூட
விளைந்த உறவாய்க் கொண் டார்
தேடி வந்த அரக்கன் தானோ
தெய்வத் தம்பி ஆனான்
தேர்தல் தோறும் பிறக்கும் இராமர்
தீமை செய்ய வாரார்


வந்து விடுவார் வந்து விடுவார்
வந்து விடுவார் இராமர்
வலிகள் சேர்க்கும் இரத்தம் கேட்கும்
வன்முறைக்காய் வருவார்
அனைவரையும் உறவு கொண்ட
அந்த இராமர் இல்லை
அன்பு கொன்ற மனிதர் கொண்ட
இந்த இராமர் வேறு

பட்டம் கொள்வார்

சின்ன வயதினில் கொள்ளை யடித்திடச்
சிறப்புறக் கற்றவர்கள் இங்கு
சிறப்புறக் கற்றவர்கள்
இங்கு
சீரற்ற முறையினில் வென்றவர் வீட்டினில்
சேவகம் செய்பவர்கள் என்றும்
சேவகம் செய்பவர்கள்

மன்னவரென் றெவர் வந்திட்ட போதிலும்
மாலைகள் சூட்டுபவர் வீழ்ந்து
மாலைகள் சூட்டுபவர்

மனம் போன போக்கினில் வாழ்பவர் முன்னரோ
மண்டிகள் போடுபவர் என்றும்
மண்டிகள் போடுபவர்

இனம் சேர்ந்து விருதுகள் பல வாங்கி வாங்கியே
ஏளனப் பட்டவர்கள என்றும்
ஏளனப் பட்டவர்கள்

ஏளனப் படுவதில் சுகம் கண்டு சுகம் கண்டு
ஏவல் நாயானவர்கள் இங்கே
ஏவல் நாயானவர்கள்


எவருக்கு முன்னாலும் நெளிந்து நெளிந்திவர்
இரு கைகள் கட்டி நிற்பார் தங்கள்
இரு கைகள் கட்டி நிற்பார்

எல்லாச் சபையிலும் பொல்லாப்பு இன்றியே
ஏய்ப்பதில் வெற்றி கொள்வார் இவர்
ஏய்ப்பதில் வெற்றி கொள்வார்

தவறுக்கு ஏமாறும் பணம் படைத்தோர் தமை
தனதாளாய் ஆக்கிக் கொள்வார் இவர்
தனதாளாய் ஆக்கிக் கொள்வார்

தன் புகழ் இல்லாமல் புகழ் படைத்தோர் தம்மின்
தனிப் புகழ் தன்னில் வாழ்வார் இவர்
தனிப் புகழ் தம்மில் வாழ்வார்

எவருக்கு எது நேர்ந்த போதிலும் தனைகாக்க
எதையுமே செய்து நிற்பார் இவர்
எதையுமே செய்து நிற்பார்

ஏய்ப்பது நல்லவர் தம்மையே பணத்தின் முன்
எடு பிடியாக நிற்பார் அவர்
எடு பிடியாக நிற்பார்

சுவருக்காய் அலைகின்ற கழுதைகள் இவற்றுக்கு
சொரணைகள் இருப்பதில்லை என்றும்
சொரணைகள் இருப்பதில்லை

சோதனை வேதனை சாதனை அனைத்திற்கும்
சொறிந்திவர் வாழுகின்றார் புண்கள்
சொறிந்திவர் வாழுகின்றார்

துறவியர் வேடத்துக் கொலைகாரர் கூட்டத்தில்
தூயராய்க் காட்டிக் கொள்வார் இவர்
தூயராய்க் காட்டிக் கொள்வார்

துயரின்றிச் சுரண்டியே வாழ்பவர் தமக்கிவர்
துணையாகிப் பணம் பெறுவார் இவர்
துணையாகிப் பணம் பெறுவார்

உறவுக்காய் ஏங்கிய ஏழை குலப் பெண்ணின்
உடல் அழித் தொதுக்கி வைப்பார் இவர்
உடல் அழித் தொதுக்கி வைப்பார்

ஊருக்குள் கவிஞராய்ப் போலிகள் பணத்தினில்
ஊர்வலம் தினம் வருவார் இவர்
ஊர்வலம் தினம் வருவார்

கரவுகள் கரவுகள் ஆயிரம் கரவுகள்
கழிசடை வாழ்க்கை வாழ்வார் இவர்
கழிசடை வாழ்க்கை வாழ்வார்

கவலைகள் இல்லாமல் மானமே கொள்ளாமல்
கணக்கின்றிப் பட்டம் கொள்வார் இவர்
கணக்கின்றிப் பட்டம் கொள்வார்

வணங்குகின்றேன்

காட்டுகின்றார் நல்வழியே காட்டுகின்றார்
கடவுளவர் நல்வழியே காட்டுகின்றார்
பூட்டுகின்றார் நல்வினையே பூட்டுகின்றார்
பொறுப்போடு வாழ்வதற்கு வகைகள் செய்தார்
கூட்டுகின்றார் நல்லவரை நண்பரெனக்
கொள்கையுடன் வாழ்வாரைச் சேர்த்து வைத்தார்
பாட்டினிலே அவர்தம்மைப் பாடுதற்கும்
பைந்தமிழை எனக்களித்துப் போற்றுகின்றார்

நாட்டு மக்கள் எனைக் கண்டு போற்றி நிற்க
நலமுடையோர் கூட்டமெல்லாம் வாழ்த்தி நிற்க
கேட்காமல் நல்லதெல்லாம் தானளித்து
கேளாரும் என் பேச்சைக் கேட்க வைத்து
ஆட்டுகின்றார் எம்மிறைவர் எம்மை நன்கு
ஆடுகின்றேன் பைந்தமிழால் ஆடுகின்றேன்
கூட்டுவித்த எம்மிறையே எந்தனது
குலம் காக்கும் பேரிறையே வணங்குகின்றேன்

என்றும் என்றும்

படுத்தவுடன் உறங்குகின்றோம் என்று சொன்னால்
படைத்தவரும் காட்டுகின்றகருணை யது
அடுத்தவர்க்கு நன்மை செய்தோம் என்று சொன்னால்
ஆண்டவனார் அருளிச் செய்த அன்பு அது
கெடுத்தவர்க்கும் நன்மை செய்தோம் என்று சொன்னால்
கேட்காமல் இறைவன் தந்த பண்பு அது
தொடுத்து இந்த நற் குணங்கள் அனைத்தும் தர
தொழுது நிற்பேன் என்னிறையை என்றும் என்றும்

வேறு என்ன

தவறதுவே ஒழுக்கம் என்று வாழுகின்ற
தலைவர்களைக் காண்கையிலே வருத்தம் கொண்டோம்
எவரேனும் அவர் குறித்துப் பேசாமலே
எப்போதும் புகழுகின்றார் தவித்து நின்றோம்
சுவர் போலே வாழுகின்றார் நாணமின்றி
சொல்வதற்கு யாருமில்லை துன்பம் கொண்டோம்
அவரேனும்கேட்பாரா ஆண்டவர்தான்
அதை நம்பி வாழுகின்றோம் வேறு என்ன

மேன்மையாவீர்

மண்டியிட்டுத் தொழுபவரும் மனத்திற்குள்ளே
மந்திரங்கள் சொல்பவரும் சிலுவை முன்னே
தெண்டனிட்டு நிற்பவரும் அனைவருமே
தெய்வமதை மனதில் கொண்டு நிற்பவர் தான்
கொண்ட தெய்வநம்பிக்கை உண்மை யென்றால்
கோஷங்கள் சண்டைகள் இங்கெதற்கு
ஒன்றிணைவீர் சண்டை விட்டுத் தெய்வம் தன்னை
உண்மையென்று உணர்ந்தால் நீர் மேன்மையாவீர்

கோயிலுக்குள் நிற்பவரும் இறைவன் தன்னைக்
கொண்டாடித் துதிப்பவர் தான் ஐந்து வேளை
தானிருக்குமிடத்தினிலே இறைவன் தன்னை
தான் பணிந்து தொழுபவரும் சிறந்தவர் தான்
வானிருந்து வந்த மகன் சிலுவை தன்னை
வணங்கி நிற்கும் அன்பருமே நல்லவர் தான்
நாணாமல் சண்டையிட வழி வகுக்கும்
நலமற்றோர் தனை ஒதுக்கி வெல்ல வேண்டும்

தமிழரிங்கு

எத்தனையோ பேர் சொன்னார் கேட்டா வாழ்ந்தீர்
எவரெவரோ சொன்னாலுமுணர்ந்தா வாழ்ந்தீர்
வித்தகமாய்ப் பேசிடுவீர் மேலும் மேலும்
விளக்கங்கள் கூறிடுவீர் தவறையெல்லாம்
மொத்தமெனக் குத்தகைக்கு நீரே கொள்வீர்
முத்தமிழா உமக்கேதான் சொந்தம் என்பீர்
எத்துவாளித்தனம் எல்லாம் உமக்கே சொந்தம்
என்ன செய்ய நாங்களும் தான் தமிழரிங்கு

அழுது நிற்கும்

கோடிகளாய்ச் சேருங்கள் ஏழைகளின்
குமுறல்களை அழுகைகளைப் புறந் தள்ளுங்கள்
பேடிகளாய் வாழுங்கள் சேர்த்து விட்ட
பெரும் பொருளை பத்திரமாய்க் காத்திடுங்கள்
நாடி தளர்ந்தொடுங்கி உயிர் பிரியும் நேரம்
நடந்ததெல்லாம் ஒரு நொடியில் நினைவில் வரும்
கூடி அழும் உறவு எல்லாம் உமக்கு அல்ல
கோடிகளை கணக்கிட்டே அழுது நிற்கும்

அழியச் செய்தோம்

தமிழுக்காய் தங்களையே அழித்துக் கொண்டோர்
தாய் தந்தை குடும்பத்தை மறந்து நின்றோர்
அமிழ்தொழிக்கும் இனிய நந்தம் மொழி தமக்காய்
அன்றிருந்து வறுமை தமக்கு ஆளாய்ப் போனோர்
இமை மூடும் வரை மொழிக்காய் தம்மைத் தந்தோர்
இல்லையென்று போனாரா இன்னும் வாழ்ந்தார்
நமை நினைத்தால் கேவலமே மிஞ்சும் அந்த
நல்லவர்கள் குடும்பமெல்லாம் அழியச் செய்தோம்

தியாகராஜ பாகவதர்

வேற்றுமொழிப் பாடலினைப் பாட மாட்டேன்
வேண்டு மட்டும் தமிழிசையே பாடி நிற்பேன்
கூற்றுவன் போல் வறுமை எனைக் கொன்ற போதும்
கூடி நின்றார் எனை விட்டுச் சென்ற போதும்
ஏற்ற மொழி எந்தன்மொழி இறைவன் மொழி
என் மொழியாம் தமிழிலேயே பாடி நிற்பேன்
ஆற்றல் மிக்க தியாகராஜ பாகவதர்
அவரையும் நாம் வறுமையிலே விட்டு விட்டோம்

தமிழர் வழி

குறள் ஒன்றே போதும் நந்தம் வாழ்வினிலே
கொற்றவர் போல் வாழ்வதற்கு தமிழர் பெற்ற
வரம் அதனை மறந்து இங்கே தமிழரெல்லாம்
வாழ்வதற்கு யார் யாரோ தேடுகின்றார்
பிறர் காட்டும் வழிகளெல்லாம் பிழை வழிகள்
பெரியவர் போல் நடிக்கின்ற சனி வழிகள்
குறள் வழியே மனித வழி மனிதம் தன்னை
கொண்டாடி புகழ் சேர்க்கும் தமிழர் வழி

வாங்கிடுங்கள்

இயல்பான வாழ்க்கை யதை வாழ்ந்திருந்தால்
எல்லார்க்கும் எப்போதும் துன்பம் இல்லை
அயலாரைப் பார்த்தவர் போல் வாழ்வதற்காய்
ஆசைகளைக் கொள்வதிலே அர்த்தமில்லை
துயரங்கள் துன்பங்கள் என்பதெல்லாம்
தூரவே சென்று விடும் ஆசை விட்டால்
அயர்வின்றி மனம் நிறைந்து வாழ்ந்திடுங்கள்
அனைவருமே வாழ்த்தி நிற்பார் வாங்கிடுங்கள்

ஏழைகள்

ஏழைகள் மட்டுமே எரிகின்றார் இங்கே
இருப்பவர் சுகமாய் இருக்கின்றார்
கோழைகள் எரிந்தவர் புகழைக் கொண்டு
கொள்கைக் கூட்டம் போடுகின்றார்
வாழையைப் போலத் தமையே தந்தார்
வறுமையில் வாடிய இளைஞர் அவர்
பேழைகள் சேர்த்துப் பிழைக்கும் தலைவர்
பெரிதாய்க் கூச்சல் போடுகின்றார்


தமிழர் பிணங்கள் தம்மை வைத்து
தலைவர்கள் இங்கே வாழுகின்றார்
குதியாய்க் குதித்துக் கோபம் காட்டி
குரலை உயர்த்திப் பேசுகின்றார்
இவர்களை நம்பி இதற்கு முன்னாலே
எரிந்தவர் குடும்பம் காத்தாரா?
எவரை எதிர்த்து எரிந்தாரோ இவர்
அவரோடேயே போய்ச் சேர்ந்திட்டார்


அங்கே அழிவதும் தமிழினம்தான்
அதற்காய் எரிந்தவர் தமிழினம்தான்
இங்கே ஆடிடும் தலைவர்கள் இவர்க்கு
இதயம் இருப்பது தேர்தலில்தான்
சங்கே முழங்கு என்ற பாரதி
தாசனும் இங்கே இன்றில்லை
சரியாய் மீண்டும் ஏழைகள் தம்மைச்
சாவில் தள்ளுதல் முறை தாமோ

வாழி நீவீர்

ஏழையரே சாதி மதம் விட்டு விட்டு
எல்லோரும் ஒன்றாகப் போரிடுங்கள்
கோழைகளாய் உங்களையே ஏய்த்து வாழும்
கொள்ளையரை அடியோடு வேரறுங்கள்
நாளை இந்த நாடு உங்கள் கைகளிலே
நம்பிக்கை கொள்ளுங்கள்வெற்றி கொண்டு
ஏழைகள் தான் மனிதர் என்று உலகம் காண
இணைந்திடுங்கள் வெல்லுங்கள் வாழி நீவீர்

சுடலைமாடன்வருவான்

இருநூறு ருபாய்க்காகச் சிறுமியினை
இப்படியும் அப்படியும் உதைக்கின்றாரே
பல நூறு கோடிகளை வெட்கமின்றி
பங்கிட்டு வாழுகின்ற தலைவர்களை
திரு நாட்டின் கேவலமாய் நாணமின்றி
தேர்தல் தோறும் வருகின்ற திருடர்களை
வறுத்தெடுக்கச் சுடலை மாடன் வருவான் என்றே
வணங்கி நின்றுக் குலவையிட்டோம் வருவான் அவன்

நாடொழிக்க

திருடியதாய்ச் சொல்லி ஏழைச் சிறுமி தன்னை
தேம்பியழத் துன்புறுத்தும் காவலர்கள்
அறிவிழந்த கொடுமையினைக் காணும் நேரம்
அடி வயிறு கொதிக்கிறது வறுமையென்னும்
கொடுமையினை வைத்தன்றோ ஏழைகளை
கூப்பிட்டுக் கூப்பிட்டுக்கொல்லுகின்றார்
அடியவராய்க் கோடிகளைக் கொள்ளையிட்டார்
அடிகளிலே இவர் விழுந்து வணங்குகின்றார்



சத்தியத்தின் பெயரிலே கொள்ளையிட்டார் மேலே
சரியாக வைப்பாரோ கைகளினை
மெத்தை வீட்டுத் தலைவர்களாய் மாறி நிற்கும்
மேல்மினுக்கிக் கொள்ளையரைப் பிடிப்பாரோ தான்
எத்தர்களை மக்களது வரிப் பணத்தை
ஏய்த்திங்கு வாழ்வாரை அடிப்பாரோ காண்
செத்தொழிந்து போகாமல் மனிதரென்று
சீர் கெட்டார் வாழுகின்றார் நாடொழிக்க

பட்டுகோட்டையார்

ஏழைகளின் மொழியினிலே ஏழைகட்காய்
எப்போதும் எழுதி நின்ற இயக்க மவன்
கோழைகளின் மனத்தினிலும் கொள்கைகளை
கூத்தாட வைத்து நின்ற போர்க் கவிஞன்
வாழையடி வாழையாகக் கூனி நின்ற
வகையாரின் குறுக் கெலும்பாய் வந்த தோழன்
நாளை வரும் வாழ்க்கையதை ஏழைகளின்
நலம் காணும் வழியினிலே பாட்டிசைத் தான்


தூங்குவதில் சுகம் கண்டார் தனை எழுப்பி
தொண்டு செய்ய வழி சொன்ன உண்மைத் தோழன்
ஏங்கி நிற்பார் திருடாமல் இருப்பதற்கு
இருப்பவரே காரணமென்று உரைத்த நண்பன்
வாங்கி வாங்கிச் சேர்த்தவர்கள் தராத போது
வயிறு பசித்தழுபவர்க்காய் வழிகள் சொன்னான்
ஓங்கி நல்ல வழிகளெல்லாம் சொல்லி நின்ற
உயர் பட்டுக்கோட்டையாரின் வழியில் நிற்போம்

32 வது சென்னை புத்தகக் காட்சி தலைவர் காந்தி கண்ணதாசனோடு

விருந்திற்கு வந்திருந்தார் இல்லத்திற்கு வெல்தமிழின் இசை அறிஞர் துணைவியோடு