ஒதுங்கி விடும்

மரணத்தை நோக்கியே பயணங்கள் அனைத்துமே
மனதினில் கொண்டு வாழ்வார்
மனிதனாய் வாழ்வதில் மனங் கொண்டு மனங்கொண்டு
மனிதருக்கு உதவி நிற்பார்
சரணமாய் இறைவனின் சந்நிதி முன் நிற்பார்
சத்தியம் கொண்டு வாழ்வார்
சகலரும் வாழ்ந்திட தன்னையே தந்திடும்
சமரச வாழ்வு வாழ்வார்


கோடிகள் கொண்டிட எண்ணங்கள் கொண்டவர்
கொள்கைகள் இன்றி வாழ்வார்
குடும்பத்தை அன்றியே ஊரினில் யாரையும்
கூட்டாக எண்ண மாட்டார்
நாடி தளர்ந்தெலாம் ஒடுங்கிய பின்னரும்
நல்லதை நாட மாட்டார்
நல்லவை இவர் வீட்டு வாயிலைக் காணவே
நாணியே ஒதுங்கி விடும்