ஆடும் பிள்ளை

விருது பெறா வள்ளுவர்தான் இன்றும் இங்கு
வீற்றுள்ளார் அரியணையில் இராமனது
சரிதை தந்த கம்பன்தான் சோழனையே
சரியாக வினாவெழுப்பி விலகிச் சென்றான்
அரிதான பெண்ணொருத்தி பாண்டி நாட்டை
அனலுக்குத் தந்த கதை தந்த அடிகள்
விருதாலே வாழ்ந்தவரா இல்லை இல்லை
வியன் அறிவால் நேர்மையினால் வாழுகின்றார்


விருதுக்குச் சண்டையிடும் விருதாக்களும்
விருதளிக்கும் குழு சேர்ந்த படவாக்களும்
அரிதான விருதளித்தாற் போல இங்கு
ஆட்சியிலே அமர்ந்திருக்கும் தெருவாட்களும்
உரிதானோர் பார்வையிலே உயர்ந்தார் இல்லை
ஒரு நாளும் இவர் திருந்த முயன்றாரில்லை
கருதாமல் தங்கடமை ஆற்றி நிற்பார்
கனித் தமிழாள் மடியினிலே ஆடும் பிள்ளை