கட்டாயம் வேணும்

அய்யா நான் எழுதியுள்ள கதைகள் நூறு
அப்படியே உங்களுக்கு அனுப்பியுள்ளேன்
பொய்யாத பொய்யென்று நாவல் ஒன்று
போட்டேன் நான் இவ்வாண்டு அனுப்பியுள்ளேன்
கையாலே செய்து தரும் விருது பல
கழகங்கள் ஊர் ஊராய்ச் செய்து தந்தார்
மெய்யான அரசாங்க விருது ஒன்று
மேலிடத்தில் சொல்லி வாங்கித்தரவே வேண்டும்.

இருப்பேனோ மாட்டேனோ சாவதற்குள்
எப்படியும் அரசாங்க விருது வேண்டும்
உருப்படியாய் எழுதவில்லை என்று சொல்லும்
ஒதவாக்கரைப் பேச்சை ஒதுக்கித்தள்ளும்
படிப்படியாய் விருதளித்த பாங்கை எல்லாம்
பார்த்ததனால் கேட்கின்றேன் தந்து விடும்
கடுப்படிக்க வேண்டாம் அன்னை தமிழ்
கட்டாயம் உமைக் கேள்வி கேக்க மாட்டா!

தடுப்பதற்கு எவன் இருக்கான்? சொன்னாக்கேளும்
தருவதுதான் உமக்கு வழி முன்னே வாரும்!
இடுப்பழகுப் பொண்ணா நான் பொறந்திருந்தா
எப்பமோ தந்திருப்பீர் விருதை எல்லாம்!
உடுக்கடிக்க பயலெல்லாம் வாங்கிப்புட்டான்.
ஒமக்கென்ன கட்டாயம் வேணும் தாரும்!
அடிக்கடியா கேப்பேன் நான் சொன்னாக்கேளும்
அய்யா இந்த வருசம் மட்டும் எனக்குத்தாரும்!