தாய் தந்தை போற்றி நில்லும்

துறக்காத துறவியரை நம்பி இன்னும்
  தொடர்வாரைக் காண்கையிலே துன்பம் கொண்டேன்
  அற நிலைகள் தனை மறந்து வணிகம் ஆக்கி
  ஆடுகின்றார் விளம்பரங்கள் போடுகின்றார் 
  சிறப்பாக நமக்கு வழி காட்டுதற்காய்
  சேர்க்கின்றார் கூட்டங்கள் அதற்கும் கூட
  திரைப் படத்தார் துணையைத் தான் தேடுகின்றார்
  தெய்வமதை விளையாட்டாய்க் காணுகின்றார்

  என்னிடத்தில் வாருங்கள் நிம்மதியை
  எப்போதும் பெறுவதற்கு வழிகள் சொல்வேன்
  தன்னிலையை உயர்த்துதற்கு மிகச் சிறந்த
  தனி வழிகள் நூறு உண்டு வருக என்பார்
  அன்னவர்க்கு நோய்கள் வர உடனடியாய்
  அங்குள்ள மருத்துவரைத் தேடிடுவார்
  சின்னவராய் நமை ஏய்க்கும் இவரை யெல்லாம்
  சீண்டாதீர் தாய் தந்தை போற்றி நில்லும்