உணர்வீர் நீரே

ஏழைகட்கு கல்வி கற்க உதவுதற்காய்
எடுக்கின்றார் விழா ஒன்று ஊரில் உள்ளோர்
ஏழை வீட்டுக் குழந்தைகளைக் கொண்டு வந்து
ஏற்றுகின்றார் மேடையிலே உதவி செய்ய
கோழைகளாய் அவர் பெற்றோர் குழந்தைகளின்
கூட வந்து நிற்கின்றார் வறுமையாலே
ஏழைகட்கு உதவுவதை புகைப் படமாய்
எடுத்ததனைச் செய்தியென ஆக்குகின்றார்


குழந்தைகளைக் கொண்டு வந்து ஏழையெனக்
கூட்டத்தில் காட்டி மனம் கொல்லுகின்றார்
இழப்பதுவோ அவர் மானம் கொடுப்பவரும்
இழக்கின்றார் தன் மானம் ஆமாம் ஆமாம்
கொடுப்பதனை ஊருக்குச் சொல்லுவதும்
குழந்தைகளை ஏழையெனக் கொல்லுவதும்
சிறப்புடைத்தோ இல்லை இவர் செய்கை இது
சிறுமையினைக் காட்டுவதே உணர்க நீரே