நடந்தார்

அமைச்சர்களின் மகிழூந்து அவர்கள் மட்டும்
அங்கேயும் இங்கேயும் போவதற்காய்
நமைப் போன்றோர் தந்து விட்ட வரிப் பணத்தால்
நம் மரசு வாங்கியதென் றுணராதார்கள்
குமைகின்றார் வெட்டுப் பட்ட காவலரை
கூட்டி அதில் சென்றிருந்தால் பிழைப்பாரென்று
அமைத்துள்ள ஆம்புலன்ஸ் அதற்குத்தானே
அதற்குள்ளே அவர் இறந்தால் என்ன செய்ய


அமைச்சர்கள் நம் அமைச்சர்கள் தான் ஆகா ஆகா
அனுதாபப் பேரறிவு அமைச்சர் கண்டீர்
குமைக்கின்றார் ஒன்றுணர மறுக்கின்றார் காண்
குண்டிருந்தால் என்ன செய்ய அய்யோ பாவம்
நமைப் பிரித்து மதத்தாலே நவகாளியில்
நாளெல்லாம் இரத்த ஆறு ஒடும் நேரம்
நினைத்தாரா காந்தி அண்ணல் இதனை எல்லாம்
நேராகக் குண்டுகளுக்கிடை நடந்தார்

கொடுவழியினிலே

வன்முறையற்ற வழிமுறை ஒன்றை
வகுத்தே தந்தார் காந்தி மகான்
நன்முறை ஏற்றார் மண்டேலாவும்
நல்லவர் மார்ட்டின் லூதருமே
தன் முறை யென்று சொன்னாரா? எம்
தாயக முறையே இதுவென்றார்
வன்முறையாளர் அவரைக் கொன்றார்
வன்முறையாம் கொடு வழியினிலே

வீரர் இல்லை

கொல்லப்படுவோம் என்று உணர்ந்தும்
கொஞ்சம் கூட அஞ்சா வீரர்
வெல்லல் என்பது அன்பால் என்று
வீரம் அதனைக் காத்தும் நின்றோர்
கல்லாய் இன்றிக் கனியாய் இருந்த
காந்தி எனும் அந்த வீர மகன்தான்
எல்லாருக்கும் தந்தை ஆனால்
எவரும் இங்கே வீரர் இல்லை

வீரர் இல்லை

காந்தி எனும் மாமனிதர் அகிம்சை என்னும்
கனவதனை மெய்யாக்கி வென்ற வீரர்
ஏந்தி நின்ற பதவிக்கு ஏற்றம் தந்து
ஏழையென வாழ்ந்த காமராசர் வீரர்
சேர்ந்து நிற்கும் வறுமை ஒன்றே துணையாய்க் கொண்டு
சீராக வாழ்ந்து வென்ற கக்கன் வீரர்
ஆழ்ந்திதனை உணர்ந்தவர்கள் அறிவார் இங்கு
அவருக்குப் பின்னாலே வீரர் இல்லை

காந்தி அடிகள்

பூரியிலே இருக்கின்றார் காந்தி அண்ணல்
புகழ் பெற்ற ஜகன்நாதர் கோயிலின் ஊர்
சேரியிலே இருக்கின்றார் சூழ்ச்சியினால்
சிறுமைக்கு உள்ளான அரிஜனங்கள்
யாரும் அந்த கோயிலுக்குப் போதல் வேண்டாம்
என்பதுவே காந்தி அண்ணல் உண்மை உள்ளம்
சீர் உணர்ந்து அரிஜனங்கள் கோயிலுக்குள்
செல்லும் வரை நமக்கில்லை கோயில் என்றார்


ஆர்வமதால் விளைந்திட்ட ஆசையினால்
அன்னை கஸ்தூரி பா செல்ல முடிவெடுத்தார்
சேர்ந்து மகாதேவ தேசாய் அங்கு அவருடனே
சென்று விட்டார் கோயிலுக்கு வணங்கி வந்தார்
சோர்ந்து விட்டார் அடிகளுமே செய்தி கேட்டுச்
சொல்லொணாத துயரத்தில் ஆழ்ந்து விட்டார்
வீழ்ந்ததங்கு அவர் நாடித் துடிப்பு உடல்
வியர்க்கிறது மருத்துவர்கள் ஒடி வந்தார்

ஆழ்ந்த ஒரு கவலை கொண்டார் அடிகள் தானும்
அறிவித்தார் துணைவிக்கும் நண்பருக்கும்
தேர்ந்தெடுத்த கொள்கை வழி விட்டு நீங்கள்
திருடரைப் போல் கோயிலுக்குச் சென்றதென்ன
பேர்ந்ததெந்தன் மனம் என்றார் தேசாய் சொன்னார்
பெரிய நல்ல மகானோடு இருத்தல் என்றல்
தான் துயரம் ஒரு நொடியில் தவறினாலே
தந்தையையே இழந்து விட இருந்தோம் என்று

காந்தியடிகளும் சீடரும்

                  இங்கிலாந்து சென்றிருந்த  காந்தியாரை
                          எல்லோரும்  சந்திக்க   விரும்புகின்றார்
                  அங்கவரில்  நகைச்சுவையின்  அரசரென்னும
                          அறிஞர் சார்லி  சாப்ளினும்  ஒருவராவார்
                   இங்கிதனை அடிகளிடம்  நண்பர் சொன்னார்
                          யார்  அந்தச் சாப்ளின் என்றடிகள் கேட்டார்
                   தம் கடமை தனை  மட்டும் உணர்ந்து நின்றார்
                           தானறியார் திரைப் படத்துப்  பெரியார் தன்னை


                   இங்கிதைப்  போல்  ஒரு  செய்தி  தமிழகத்தில்
                           என்.எஸ்.கே.என்னும்  நந்தம்  கலைவாணர்தாம்
                   தம் குடும்ப விழாவிற்காய்   சிவாஜியுடன்
                            தமிழ்க்  கண்ணதாசனையும்  அழைத்திருந்தார்
                   பொங்கு தமிழ்க் கவிமணியாம்  காந்தி  அன்பர்
                            பொறுமைமிகு தேசிக  வினாயகத்தை
                    இங்கிவரும்  காணுதற்கு விழைந்ததாலே
                             இருவரையும்  அவரிடத்தில்  அழைத்துச் சென்றார


                    கவிஞர்  இவர்  கண்ணதாசன்  என்று  சொல்ல
                             கவிமணியார் உளம் கொண்டு  வாழ்த்தி நின்றார்
                    இனிய தம்பி  சிவா  ஜி  கணேசன்  இவர்
                             என்று  சொல்ல  கவிமணியார்   மெல்லக் கேட்டார்
                    சரி  இவர்கள்  செய்யும்  தொழில்  என்ன  என்றார்
                             சட்டென்று  கலைவாணர்  சிரித்துச் சொன்னார்
                    திரைப் படமே  பார்த்ததில்லை பாட்டையாவும்
                             தெரியவில்லை  சிவாஜியை  விளக்கம் சொன்னார்