தாதா கங்குலி வாழ்க

தனக்காக ஆடாமல் நாட்டிற்காக
தயங்காமல் ஆடி நின்ற நல்ல வீரன்
பிணக்கேதும் இல்லாமல் இளையவரை
பேர் சொல்லி அணிக்குள்ளே சேர்த்த வீரன்
கணக்காக வெளி நாட்டில் வெற்றிகளை
கண்ணியமாய்ப் பெற்றளித்த உயர்ந்த வீரன்
கங்குலி பிறந்த நாள் இன்று அந்த
கனிவான தாதாவை வாழ்த்துகின்றேன்

வெள்ளையரின் விளையாட்டு

விடுதலையைப் பெற்று விட்டோம் என்றிருந்தோம்
வினைகளைத்தான் விட்டுச் சென்றார் வெள்ளையர்கள்
உடுத்துகின்ற ஆடையதில் துவக்கம் ஆகி
ஒவ்வொன்றாய் அவராய்த்தான் வாழுகின்றோம்
படுத்துகின்ற மட்டைப் பந்து ஆமாம் ஆமாம்
பாவியவர் தந்து சென்ற கேடு அன்றோ
தடுப்பதற்கு யார் உண்டு அனைவருமே
தருவதனைப் பெறுகின்ற பெரியர் அன்றோ


உடுத்துகின்ற ஆடையதை ஒன்று ஆக்கி
உலகத்தைப் பார்க்க வைத்த காந்தி அண்ணல்
மிடுக்கோடு வாழ்ந்திருந்தார் வெள்ளையரை
மென்மையான முறைகளினால் வென்றெடுத்தார்
அடுத்து வந்தார் பலர் செய்த தவறுகளால்
அந்நியராய் உள் நாட்டில் வாழுகின்றோம்
படுத்துகின்ற வெள்ளையரின் விளையாட்டிங்கு
பகல் இரவாய்ப் படுத்துகின்ற கொடுமை கொண்டோம்

மோடிகளின் வேலை இது

ஆடுகின்றார் விளையாட்டார் நடுவில் என்றால்
ஆடுகின்றார் பெண்களுமே ஆடை இன்றி
கூடுகின்ற கூட்டமதோ ஏய்க்கும் கொள்ளைக்
கூட்டத்தை உணராமல் கூடுதிங்கு
வாடி நிற்கும் ஏழையரைக் கூட இது
வதைக்கிறது கொல்கிறது அழிக்கின்றது
மோடிகளின் வேலை இது தெருவோரத்து
மோடி மஸ்தான் ஏழை இவர் கோடீஸ்வரர்

உயர்வீர் நீரே

வென்று விட்டார் என்றாலே வாழ்த்துவது
வீழ்ந்து விட்டார் என்றாலே தூற்றுவது
தொன்று தொட்டு நம் நாட்டார் தோல்வியிது
தொட்டில் பழக்கம் அது தொடருதிங்கு
நின்றெதையும் சிந்தித்து உணர்ந்து பின்னர்
நிலை தெளிந்து பேசுதலே உண்மையாகும்
என்றுணர்வீர் அன்றேதான் இந்த நாட்டின்
நிலையுயரும் உணர்ந்திங்கு உயர்வீர் நீரே

குமுறுகின்றார்

வென்று விட்டார் என்றவுடன் ஊர்வலங்கள்
வீதியெங்கும் தோரணங்கள் மக்கள் வெள்ளம்
கொன்று விட்டார் என்றெல்லாம் கூப்பாடுகள்
கோடிகளை அவர்க்களித்துக் கொண்டாட்டங்கள்
நின்றபடி வந்தவரை வாழ்த்தி வாழ்த்தி
நிலை குலைந்து நின்றன்று ஆடியவர்தான்
கொன்றிடுவோம் கேவலம் இத் தோனிதன்னின்
கூட்டத்தை என்றெல்லாம் குமுறுகின்றார்