ஓங்குகின்றார்

வெறுத்தல் கொண்டு வாழ்ந்தவர் எல்லாம்
வீணென வீழ்ந்தே இறந்து பட்டார்
வெறுத்தல் இல்லா விரிமனத்தாரோ
வென்றிவண் உயர்ந்தே வாழ்ந்து நின்றார்
அறத்தின் வழியை அறவே துறந்தவர்
அபலைகளாகி தெருவில் நின்றார்
அறமே வாழ்வெனக் கொண்டே வாழ்ந்தார்
ஆண்டவனாகிப் பொலிந்து நின்றார்

இறப்போம் என்றே துடிப்பவர் எல்லாம்
இறந்தே இறந்தே வாழுகின்றார்
இறப்பை உணர்ந்து பொறுப்பாய் உள்ளோர்
என்றும் என்றும் வாழுகின்றார்
மறப்போம் என்ற நினைப்பே இல்லார்
மனதால் மனதால் வீழுகின்றார்
மறத்தல் மறந்து துறந்தே வாழ்வோர்
மனிதர்களாகி வாழுகின்றார்

கறத்தல் எதையும் எங்கும் என்போர்
கவலைகளாலே மாளுகின்றார்
கறத்தல் இரத்தல் சுருட்டல் இல்லார்
காவலர் ஆகி ஆளுகின்றார்
பொறுத்தல் இல்லாச் சிறு மதியாளர்
புண்பட நொந்தே வாடுகின்றார்
பொறுத்தல் குணமே பொறுப்பின் குணமாய்ப்
பொலிந்தவர் சிறந்தே ஒங்குகின்றார்

வழி கேட்டுப் போன தீயோர்

வாழ்க்கையை அதன் போக்கினிலே வாழுகின்ற
வழி கண்டு வாழ்ந்தாலே வெற்றி உண்டு
யாக்கை அதன் நிலையாமை அறியாராகி
யாரிடத்தோ சென்று அவர் தமை வணங்கி
போக்க வொண்ணா ஆசைகளைக் கொள்ள எண்ணி
புரியாராய் அவர்களையே துறவியாக்கி
தாக்குகின்றார் இன்று அவர் பொய்யரென்று
தறி கெட்டு வழி கெட்டுப் போன தீயோர்

அக மகிழ்ந்தார்

ஊனமுற்றோர் உடலாலே என்ற போதும்
உள்ளத்தால் உயர்ந்தவராய் ஒழுகி நின்றார்
ஊனமுற்றோர் மனதாலே அவர்களெல்லாம்
உயர் பதவி தனில் அமர்ந்து ஊர் கெடுத்தார்
ஞானமற்றோர் அதனாலே நாட்டினிலே
நலங் கெடுக்கும் அனைத்தையுமே தினமும் செய்தார்
ஆன மட்டும் தான் ஒருவன் பெரியன் என்று
அனைவரையும் சொல்ல வைத்து அக மகிழ்ந்தார்

வேடத்தை விட்டால் போச்சு

சாமிக்குச் சேவை செய்தேன் தவறா என்று
சரியாகக் கேட்கின்றார் நடிகை இங்கு
பூமிக்கு வந்து விட்ட மனித குலம்
புரியாத எதை அவரும் புரிந்து விட்டார்
காண்பிக்கக் கண்டீர்கள் இல்லையென் றால்
காமத்தை இவ்வாறு பழி சொல்வீரோ
பூண்கின்ற வேடத்தால் தவறு என்றீர்
போகட்டும் வேடத்தை விட்டால் போச்சு

ஆசிரமம் கண்ட வழி

ஆ சிரமம் என்று ஒடி அலுத்தவர்கள்
ஆசிரமம் அமைவதற்கு வழிகள் செய்தார்
போய்ச் சிரமம் தீர்ப்பதற்கு சுவாமிகளை
புகழ்ந்து அவர் கால்களிலே வீழ்ந்து நின்றார்
தன் சிரமம் சாமிக்குத் தான் தெரிய
தழுவலுக்கும் குலவலுக்கும் மங்கை கொண்டார்
என் செய்ய சாமியும் ஒரு இளைஞர் என்ற
இனிய செய்தி ஊடகத்தின் வழியே கண்டார்

ஆயிரத்தில் ஒருவன்

வரலாற்றுப் பிழைகளையே திரைப் படத்தார்
வரவு வைத்து மகிழுகின்றார் கொடுமை இதை
குரல் கொடுத்துக் கேட்பதற்கோ அறிஞர் இல்லை
குழப்பம் இதில் சோழர்களே மாட்டிக் கொண்டார்
அரன் பக்தன் அரியினையைக் கடலில் போட்டான்
அறிவற்றார் பிழை இதனைக் காட்டி நின்றார்
குறைச் சோழர் தனைக் கொன்று முடிப்பதற்கு
கூத்தடித்தார் ஆயிரத்தில் ஒருவன் என்று

அல்லா தீர்ப்பளிப்பார்

எல்லாப் புகழும் இறைவனுக்கே
என்றே உணர்ந்தார் நல்லவர்கள்
வல்லான் ஒருவன் அல்லாவே
வகுத்த தெல்லாம் அவன் அருளே
பொல்லார் இங்கு ஆடுகின்றார்
புகழுக் கிவரே சொந்தமென்று
அல்லா அவர்க்குத் தீர்ப்பளிப் பார்
அவர்தம் கணக்கை முடிக்கை யிலே

பண்பு வழி

பணம் கொண்டார் தமைத் தேடி அவர்களது
பக்கத்தில் எப்போதும் இருந்து கொண்டு
குணம் கொண்ட அறிஞரையும் அவமதிக்கும்
குற்றத்தார் கவிஞரென சொல்லிக் கொள்வார்
நிணம் தசை நார் அனைத்திலுமே என்றும் எங்கும்
நீதியையே கொண்டு இங்கு அன்பால் வாழும்
குணம் கொண்ட பெரியவரோ அவர்க்கும் கூட
குளிர் முகம் தான் காட்டிடுவார் பண்பு வழி

சம்காரம் செய்ய வேண்டும்

ஆசையுடன் எழுதுகின்றார் தவறில்லையே
அறிஞர்களில் சில பேரும் வினவுகின்றார்
ஓசையின்றி அவரோடு வைத்துக் கொண்டால்
ஒருவருக்கும் துன்பமில்லை வம்பும் இல்லை
பூசையிலே வைப்பதற்கு ஏற்றாற் போல
புனை கதையும் பொய் புரட்டும் செய்வாரென்றால்
நீசர்களை ஒழிப்பதற்குத் தமிழாம் தாயார்
நேர் வந்து சம்காரம் செய்ய வேண்டும்

தேம்புகின்றார்

கற்றவர்க்கு முன்னாலே அடக்கம் காட்டார்
கல்லாத மூடர்களும் என்று அன்றே
உற்றவராம் வள்ளுவரும் உணர்த்திச் சென்றார்
உணராதார் கல்லாதார் மேலும் மேலும்
கொற்றவன் போல் ஆடுகின்றார் தங்களையே
கொலு மண்டபத்தில் வைக்க முயலுகின்றார்
பற்றற்ற கற்றவரோ அவர்களையே
பரிதாபம் என்றுணர்ந்து தேம்புகின்றார்

எத்தும் நல்லோர்

எல்லார்க்கும் நல்லவராய்க் காட்டிக் கொள்ளல்
ஏய்ப்பதிலே மிகச் சிறந்த வழியேயாகும்
பொல்லார்க்கும் புன் சிரிப்பு நல் வணக்கம்
பொறுமை கொண்ட பெருமை என்ற நல் நடிப்பு
வல்லார்க்கோ பெரும் வணக்கம் வாழ்த்துச் சொல்லல்
வாய் நிறைந்த பெரும் சிரிப்பு நெருக்கம் காட்டல்
கல்லார்க்கும் அறிஞர் என்ற பட்டம் தரல்
கணக்கிட்டு வாழுகின்றார் எத்தும் நல்லோர்

அழுகின்றார்

எழுதி விட்டால் எழுத்தாகும் என்று இங்கே
இருப்பவர்கள் சில பேர்கள் கருதுகின்றார்
பழுதாக எழுதுகின்றார் பணம் இருக்க
பள பளக்கும் புத்தகமாய் ஆக்குகின்றார்
தொழு ததனை அன்பளிப்பாய் நம்மிடத்தில்
துணிவோடு தருகின்றார் படிக்கச் சொல்லி
அழுகின்றார் தங்களது படைப்புக்களை
அச்சிடவே முடியாத அறிஞர் பல்லோர்

மனித வழி

பாதாம் பிஸ்தாவோடு குங்குமப் பூ
பக்குவமாய்க் கலந்திட்ட பாலருந்தி
தோதாக வாழுகின்ற சாமியார்கள்
துறவிய ரென்றெண்ணுகின்ற மூடத் தனம்
ஏனோ தமிழ் நாட்டில் அதிகமாக
ஏமாந்து பல பேரும் வணங்குகின்றார்
வானோர்க்கும் வழி காட்டும் வள்ளுவரை
வணங்குங்கள் அவர் வழியே மனித வழி

கொடுமை

பள பளக்கும் மகிழூந்துப் பயணம் சாமி
படுப்பதற்கோ அழுந்தி எழும் படுக்கை
வள வளவென் றுளறி நிற்கும் சாமி தம்மை
வணங்கி நிற்க பணம் படைத்த கொடியர்
உளம் இழந்த ஏழை கட்கோ துன்பம்
ஒழித்து விட வேண்டும் ஒரு வழி தான்
களம் இதனால் காமுகர்கள் எல்லாம்
காவிக்குள் நுழைகின்ற கொடுமை

நித்தியமும் ஆனந்தம்

இல் வாழ்க்கை ஒன்றேதான் சிறந்த தென்று
எம் தந்தை வள்ளுவரும் உறுதி சொன்னார்
நல் வாழ்க்கை அதுவேதான் இயல்பு என்றார்
நலம் பயக்கும் அது ஒன்றே உலகுக்கு என்றார்
பொய் வாழ்க்கை வாழ்ந் ததனால் புகழைச் சேர்த்தார்
பொசுக்கென்று பெண்ணோடு மாட்டிக் கொண்டார்
உய்வளிக்க வந்த சாமி நித்யானந்தம்
உல்லாசம் காணுகின்றார் நடிகையோடு


கதவைத் திறக்கச் சொன்னார் நம்மிடத்தில்
காமத்தில் அவர் கதவும் திறந்து கொள்ள
விதம் விதமாய்க் காட்சிகளும் நமது கண்ணில்
விரிகிறது நித்தியமும் ஆனந்தம் தான்
பதை பதைக்க வேண்டாம் இவர் மாட்டிக் கொண்டார்
பல பேர்கள் மாட்டாமல் வாழுகின்றார்
சதை வாழ்க்கை இதிலிருந்து மீள்வதெல் லாம்
சாத்தியமா ஒருக் காலும் இல்லை அய்யா

காடுகள்

ஆனைகளின் அட்டகாசம் ஊருக்குள்ளே
அடுத்தாற் போல் புலிகளது அட்டகாசம்
ஊனமுற்ற மனம் கொண்ட மனிதர்களின்
ஒலமிது செய்திகளில் வருகிறது
ஞானமற்று அவர்களது வாழ்விடத்தில்
நாடோறும் நீங்கள் போட்ட ஆட்டமன்றோ
ஆனையுடன் புலியதுவும் நீருக்காக
அங்கேயும் இங்கேயும் வருவதெல்லாம்


மலைகளுக்குள் காடுகளில் மான்களோடு
மரம் நிறையப் பறவைகளும் விலங்கினமும்
இறைவனவன் தந்திருந்தான் அவர்களுக்காம்
இடமதனைத் தலைவர்களே கொள்ளையிட்டீர்
மறைவிடங்கள் அனைத்தையுமே அழித்தொழித்தீர்
மனம் போல அரண்மனைகள் கட்டிக் கொண்டீர்
உறைவிடத்தைக் குடிநீரை இழந்ததாலே
ஊருக்குள் வருகிறது விலங்கினங்கள்


காட்டுக்குள் நீங்கள் செய்த அட்டகாசம்
கருணையற்ற அட்டகாசம் அதனை விட்டு
நாட்டுக்குள் விலங்கினங்கள் வந்தால் அதை
நாக் கூச்சம் இல்லாமல் திட்டுகின்றீர்
வீட்டுக்குள் வேறு யாரும் வந்து சென்றால்
விரைவாகத் திருடர் என்று புகாரும் சொல்வீர்
காட்டுக்குள் நீங்கள் சென்று திருடி வந்த
கதைகளினை கடவுளன்றி யார் அறிவார்

காடு வாழ

புலிகளினைக் காப்பதற்காய்க் கணக்கெடுப்பாம்
புத்தியின்றி நடக்கின்ற அரசாங்கங்கள்
வலியவர்கள் சேர்க்கின்ற பணத்தைப் பார்த்து
வறியவர்கள் ஆசை கொள்ள காட்டிற்குள்ளே
புலியல்ல சிங்கமல்ல யானையென்று
பொறுப்பின்றிக் கொல்லுகின்றார் பணத்திற்காக
மலிவாக அதைக் கூட வாங்குகின்றார்
மானமில்லா அரசியலார் அவரைக் காத்து


வளம் சேர்த்து நாடு காக்கும் அரசியலில்
வலியின்றிப் பொருள் சேர்க்கும் நாணமற்றார்
உளம் விற்று மக்களது நலத்தை விற்று
ஊர் முழுக்க சொத்துக்கள் வாங்குகின்றார்
தளம் அவர்தான் நடக்கின்ற தவறுக் கெல்லாம்
தனையறியா ஏழைகளோ விலை போகின்றார்
வலம் வந்து இவரையும் வணங்கி நிற்கும்
வறுமையினை யார் ஒழிப்பார் காடு வாழ

திரைப் படத்தார் போதனைகள்

திரைப் படங்கள் செய்கின்ற தீங்கு எல்லாம்
தினமும் ஒரு பெண்ணைத் தான் கொல்லுதிங்கு
உரைத்தாளாம் காதலிக்க மாட்டேன் என்று
உள் நுழைந்து வீட்டிற்குள் கொல்லுகின்றான்
திரைப் படத்தார் போதித்த வன்மையது
தீய்க்கிறது பெண் முகத்தை பிளேடினாலே
வரை முறையே இல்லாமல் காட்டுகின்ற
வன்முறைதான் பெண்ணினத்தை அழிக்குதிங்கு

அழிந்து விட்ட உலகம்

அழிந்து விட்ட உலகம்

உலகம் அழிந்திடுமாம் புலம்புகின்றார்
உள்ளம் அழிந்தவர்கள் ஊடகத்தில்
கலகம் பல வளர்த் தேற்கனவே
ககனத்தை பல வழியில் அழித்தொழிக்கும்
மதத் தலைவர் அரசியலார் ஆசையினால்
மக்களையே அடிமைகளாய் மாற்றி வாழும்
இனத் தலைவர் என்று இவர் அழித்தழித்
தேற்கனவே அழிந்து விட்டதுலகமிங்கு

ஏப்ரல் ௨0 2009

ஒத்தக்கடை ஆனைமலை
எத்தனை நாள் இருக்கும்
ஊர்வழியே போகையிலே
பாத்துக்கிட்டே போனேன்
கெத்தான ஆள் யாரும்
கீழ் மேலாய்ப் பணத்தை
கிண்ணாரம் கொட்டியே
அள்ளிஅள்ளித் தந்தால்
ஒத்தக்கடை கிரானைட்
ஒலகெங்கும் போகும்
ஊர்மட்டும் பொலிவிழந்து
பொசுக்குன்னு போகும்.

சத்தியமாய் இதையேதும்
சதிகாரர் கூட்டம்
சட்டுன்னு முடிச்சுட்டா
யாரு என்ன பண்ண
பத்திரமா பாத்துக்குங்க
ஒத்தக்கடை மக்கா
பாவிப்பய கூட்டம் அதை
ஒழிச்சிரவே கூடும்.