கைக் கொள்ளுங்கள்

இறைவனையே நம்புகின்ற இவர்களுக்குள்
எதற்காகச் சண்டை என்று புரியவில்லை
உறைகின்றான் இறைவன் அவன் எங்கும் என்று
உரைக்கின்றார் எதற்காக மோதுகின்றார்
அறியாமை அறியாமை அதனாலன்றோ
அங்கங்கே குத்துகின்றார் வெட்டுகின்றார்
செறிவான அறிவோடு கடவுளினைச்
சேர்வதற்கு விழைந்து நிற்பார் அமைதி காப்பார்


நம்பிக்கை உடையவர்கள் எல்லாம் ஒன்றாய்
நலம் பேணி வாழ்வதுதான் நல்ல வாழ்க்கை
கும்பிட்டு நிற்கின்றீர் இறைவன்தன்னை
குறையெல்லாம் விட்டு விட்டு நின்றாலன்றி
தம்மருளைத் தருவதற்கு இறைவன் என்ன
தனையறியாப் பேதை என்றா கருதுகின்றீர்
எம்மதமும் இறைவனையே ஏத்துகையில்
எதற்காக மோதுகின்றீர் பக்தி செய்வீர்


வேறு வேறுபெயர்களிலே இறைவன் தன்னை
விளங்கி நிற்பீர் வணங்கி நிற்பீர் பெருமை கொள்வீர்
ஊறு இல்லா வாழ்க்கை என்றால் அவனை நன்கு
உணர்ந்தறிந்து அன்பு செய்தல் ஒன்றே ஆகும்
பேறு அதைப் பெற்று விட்டால் சண்டை ஏது?
பிரிவினைகள் பேதங்கள் வருமோ நூறு
ஆறுதலைத் தாருங்கள் இறைவன் தந்த
அன்பதனை அமைதியினை கைக் கொள்ளுங்கள்