மறைந்து போவார்

கொடுப்பதில் மனங் கொண்டு சுகங் கண்டு கொடுப்பவர்
கொற்றவர் போல வாழ்வார்
கொள்கின்ற செல்வங்கள் கொடுப்பதற் கென்ற ஒரு
கொள்கையில் சிறந்து வெல்வார்
இருப்பது அனைத்தையும் தனக்கெனக் கொள்பவர்
இழிவதை ஏற்று வாழ்வார்
எப்போதும் பணமதே பெரிதென வாழ்வதால்
இருந்துமே மறைந்து போவார்


கொடுத்திங்கு வாழ்பவர் மறைந்த பின்னாலுமே
கோயிலைப் போல வாழ்வார்
கொண்டங்கு வாழ்பவர் அவர் தம்மைப் பற்றியே
கூட்டங்கள் தோறும் சொல்வார்
எடுப்பதே தொழிலென என்றைக்கும் வாழ்பவர்
இழி நிலை கொண்டு மாய்வார்
இருந்தாலும் செத்தாலும் அவர் நிலை ஒன்றுதான்
யார் இங்கு அவரை நினைவார்