வாழ்வோம்

       உன்னைப் போல்  பிறரையுமே  நேசி  என்ற
                ஒரு  வார்த்தை நல்  வார்த்தை மனதுக்குள்ளே
       மின்னலென வெட்டியது மழையும் கொட்டி
                மேன்மையுறச் செய்ததிந்த  மானிடத்தை
       தன்னை  முதல்  நேசிக்கக் கற்றுக் கொண்டால்
                 தரணியெல்லாம்  உறவாக்கிக்  கொள்வாரன்றோ
       அண்ணல்  அவர் வார்த்தையினைக் கொள்ளாரன்றோ
                 அன்றடித்தார் ஏசுவினைச் சிலுவை தன்னில்


       இன்னும்  அந்தச் சிலுவையினை  விட்டாரில்லை
                  எடுத்தெங்கும்  அலைகின்றார்  கைகளோடு
       தன்னுணர்வு  அற்றாராய் மனிதம் விட்டு
                   தடுமாறித் திரிகின்றார்  உலகமெங்கும்
       அன்னவரைக் கூட  நாம்  மன்னித்தேதான்
                   அரவணைக்க வேண்டும்  என்று அவரே  சொன்னார்
       மன்னவரின்  வழியினிலே  அன்பே செய்து
                    மரணமில்லாப் பெரு  வாழ்வு  வாழ்வோம்  என்றும்