மே தினம்

     உலகத்துத்  தொழிலாளர்  ஒன்று  கூடி
          உளம்  மகிழ்ந்து  கொண்டாடும்   மே தின  நாள்
     கலகத்துக்காரர்  என்று  கைது  செய்து
          கடுந் தண்டனை  அளித்துத்  துன்பம்  தந்தும்
     வெலவெலத்துப் போகாம்ல்  உழைப்பாருக்காய்
          வீரர்களும்  போராடி வென்ற  நாள்  காண்
     கலகலப்பாய்க்  கொண்டாட  எண்ணும்  நேரம்
          கண்ணில்  படும்  உண்மை  அதைத் தடுக்குதையா

     உண்மையிலே  தொழிலாளர்  உரிமையெல்லாம்
           உலகெங்கும்  பெற்று  விட்டார்  என்று  சொல்லல்
     கண்ணிருந்தும்  குருடரென  வாழும்   ந்ம்மைக்
          கண்டவர்கள்  உமிழுதற்கே  வழி வகுக்கும்
     அண்மையிலே  இருக்கின்ற தொழிலாளரின்
          அவதிகளைப்  பார்க்கையிலே வெட்கம் கொல்லும்
     எண்ணும்  இதைத்  தொழிலாளர்    அனைவருக்கும்
          எப்பொழுதும்  நன்மை  வர  உழைத்து  வெல்வோம்